Projetu Emergensia iha Viqueque ‘Habokur’ Deit Lider PLP

Iha tinan hirak ba kotuk mosu polemika boot iha sosiedade Timor Leste nia laran relasiona ho projetu emergensia ne’ebe hamosu divida ba estadu.

Polimika emergensia halo projetu barak mosu no projetu sira ne’e la tuir sistema planeamento ba programas  hodi hamosu mal gestão iha finanças publikas ikus mai kria tusan ba Estadu tanba ineficiência, esbanjamento, korrupsan, mal gestão.

Tanba emergensia, projetu barak laiha planeamento, laiha Bill of Quantity (BOQ) , laiha estudus biablidade laiha kontratu, satan koalia konaba manutensaun.

 Ikus mai osan ne’ebe gasta laiha valor tanba projetu barak laiha kualidade no la responde lolos ba nesesidade povu nian ne’ebe persiza atu responde urgente ou buat ne’ebe mak tuir lolos atu konsidera hanesan emergensia maibe la tau iha prioridade.

Ezenplu kiik ida, Povu iha Distritu Viqueque halerik ba Estrada ligasaun Baucau, Ossu, Viqueque Villa, Uatulari no Uatucarabao tantu Laquluta ne’ebe nia kondisaun grave tebes e persiza urgente atu rejolve maibe Estrada hirak ne’e la tau iha prioridade  governu nian tanba Governu tenki fera ulun atu buka osan hodi selu tusan ne’ebe halo ho razaun emergensia.

Projetu sira ne’ebe kria tusan ba estadu latama iha planu no programa governu nian, tanba projetu sira ne’e kompanha ida-idak ba sukat no halo pois ikus mai ejize ba governu tenki selu.

Projetu sira ne’e kaer husi kompanha sira ne’ebe mai ho naran diferensia maibe nain ba kompanha hirak ne’e ema ida deit.

Ezenplu Konstruksaun Estrada Luca Aisahe  Fatukilat Road Package II ho valor $  4,286,971.61 , Konstruksaun  Luca Aisahe  Fatukilat Road Package III ho valor  $  2,266,574.46 kaer  husi Kompanha Hoven Unip no Konstruksaun Estrada   Wefia Aitana Lacluta Viqueque ho valor  $1,860,713.13 kaer husi Golden Way Const, Lda,  Projetu New Const.Of Reinfor ced Concrete for River Bank Protection at Koha River Part 1  ho valor osan $   2,520,788.55 kaer husi kompanha  Hoven II Unip.Lda , Projetu New Const.of Gabion Protection in Koha River 3 ho valor  $   228,959.54 kaer husi kompanha Consorcio Central National  Lda iha Distritu Viqueque , Sub-distritu Viqueque, Suku Karaubalu.

Projetu New Const.of Box Culvert in TD Bridge and Lihubui River, Viqueque, Babulu ho Valor  $ 616,874.75  kaer husi Consorcio Buka Fini Hamutuk Lda.

Kompanha sira ne’ebe mak temi iha leten hanesan, Hoven Unip, Hoven II Unip.Lda,  Golden Way Const, Consorcio Central National  Lda, Consorcio Buka Fini Hamutuk Lda, kompanha sira ne’e naran ketak-ketak maibe  nain ba kompanha hirak ne’e ema ida deit mak  Tera Mau Bulak.